சலுகை மட்டும் வாழ்க்கையில்லை

சலுகை மட்டும் வாழ்க்கையில்லை

 

 

   மக்கள் தொகையில் ஒரு பாதியாக இருக்கும் பெண்களை அடிமையாக நடத்தும் எந்த ஒரு நாடும் உரிமை பெற்றதில்லை.பெண்களுக்கு சம உரிமையும் மதிப்பும் கொடுக்க வேண்டும் என்றார் பாரதியார்.

   என்ன இது? பேத்தல், எல்லா துறைகளிலும் பெண்கள் சாதனைப் புரியும் இந்நிலையில், இது தேவையில்லாத கட்டுரை  என்று நினையாமல், நம்மை விட்டு, சற்று எட்டி நின்று இக்கட்டுரையைப் படியுங்கள்.

. இந்திய கலாசாரத்தில் பெண்கள் கடவுளாக மதிக்கப்படுகின்றனர். ஆனால் நிஜவாழ்க்கையில் இங்குள்ள பெண்களின் நிலமை மிகமோசமாக உள்ளது. ஏன் சில சமயம் மிதிக்கப் படுகின்றனர் என்று கூட சொல்லலாம். மிதிக்கவும் வேண்டாம், மதிக்கவும் வேண்டாம். இங்கு ஆண் சத்தி உயர்ந்தது என்றோ பெண் சத்தி உயர்ந்தது என்றோ எதுவும் இல்லை. பெண்கள் சிந்திக்கத் தொடங்கினர். சிந்திக்கத் தொடங்கிய இப்பெண்களின் விழிப்பு நிலையே இன்று சில ஆண்களுக்குப் பிரச்சனையாக இருக்கிறது. பெண்களிடம் ஏற்பட்ட இந்த மாற்றத்தை ஆண்களின் மூளை ஏற்றுக்கொள்ள முடியாமல் திண்டாடுகிறது.

                  அறிவு கொண்ட மனித வுயிர்களை

                  அடிமையாக்க முயல்பவர் பித்தராம்,,

என்றார் பாரதி,,,,,,,

     ஆண் பெண் இருபாலரும் உணர்ந்து செயற்படும் பட்சத்தில் இந்தப் பெண்ணடிமை, பெண் அடக்குமுறை, பெண்ணை இரண்டாந்தரமாக நினைக்கும் தன்மை எல்லாமே அர்த்தமற்ற செயல்கள் என்பது நன்கு புலப்படும்.

     உண்மையில் பெண்ணுக்கு இன்னும் முழுமையான விடுதலை கிடைக்கவில்லை. வெறும் சலுகை மட்டும் வாழ்க்கையில்லை என்பதை பெண்கள் உணரத் தொடங்கிவிட்டனர்.

    உரிமைப் போராட்டங்கள் மூலம் பெண்கள் பெரும் முன்னேற்றம் அடைந்து, பல துறைகளில் பெருமை சேர்த்திருந்தாலும், உலகத்தின் பல்வேறு இடங்களில் பெண்கள் இன்னும் பின்தங்கிய நிலையில் தான் உள்ளனர். ஒரு சில நாடுகளில் இதன் கொடுமை சொல்லவே முடிவதில்லை. இந்தியாவில் ஒடுக்கப்பட்ட சமூக பெண்கள் ஆதிக்க சக்திகளால் பாலியல் கொடுமைகளுக்கு ஆளாகியுள்ளனர் என்பதை மறைக்கவும் மறுக்கவும் கூடுமோ,? சாதிய ரீதியாக தான் உயர்ந்தவன் என கொக்கரிக்கும் குள்ளநரிக்கு கூட தாழ்ந்த சாதி என சொல்லும் பெண்ணும் சந்தனம் அந்நேரத்திற்கு மட்டும்.

      தலைநகரில் ஒரு பெண்ணை ஆறு மிருகங்கள் கடித்து குதறியதும் ஏனோ,,,

 காவல் துறை அனைவரையும் காக்கும் துறை, அங்கே இருக்கும் பெண் காவலர்கள் தங்களைக் காக்க முடிகிறதா? முடியும் எனின் ஏன் இத்தனை தற்கொலைகள்,,,,,,,

                   

     பெண்கள் வெளியில் வந்துவிட்டார்கள், வேலைக்கு போகிறார்கள் என்று சொல்லும் நாம் அங்கு அவர்கள் படும் வேதனை யாருக்குத் தெரியும்? அவள் மனம் மட்டும் அறிந்த உண்மைகள் ஏராளம். நடக்கும் குற்றங்களில் 50 சதவீதம் பணியிடங்கள் சம்பந்தப்பட்டவை, வெற்றுச் சதையென பெண்மையை நினைப்பவர்களால்,அதிகரித்து வரும் பாலியல் வன்முறைகள், அதிகம் அரங்கேறுகின்ற இடத்தில் தான், அதனை எதிர்த்து தன்னை நிலைப்படுத்திக் கொண்டு வருகிறாள். எல்லா துறைகளிலும் உண்டு. ஒரு பெண் தன் திறமையால் முன்னேறும் போது நாம் அவளை என்ன சொல்கிறோம். சாதிக்க நினைக்கும் பெண்மையை போற்றவில்லை என்றாலும் தூற்ற வேண்டாமே.

     வரதட்சணை தடுப்புச் சட்டம் 1985இல் அமலாக்கப்பட்டது. ஆனாலும்  ஒவ்வொரு வருடமும் 5000 பெண்கள் வரதட்சணை காரணமாக எரிக்கப்படுகின்றனர்.கொலைச் செய்யப்படுகிற கொடுமையை நாம் படிக்க வில்லையா?பெண்களின் கொடுமைகள் இன்னமும் இந்திய கிராமங்களில் வாழ்ந்துக்கொண்டு தான் இருக்கின்றன. தவறு செய்யும் ஆண்களுக்கு சட்டம் தண்டனை அளிக்கிறது, எப்போது, காலம் கடந்து, எல்லாம் முடிந்த பிறகு,, நாங்கள் பெண்மையைப் போற்றுபவர்கள் என்றால் ஏன் இத்துனை வன்கொடுமைகள்?.

       பெண்கள் வேலைக்கு செல்வதால் ஆண்களுக்கு வேலையின்மை ஏற்படுகிறது என்ற ஒரு சிலரின் வாதம் ஏற்புடையது அல்ல. வெளிநாடுகளில் எல்லாம் குடும்பத்தில் உள்ள இருவருமே வேலைக்கு செல்கிறார்கள் சம்பாதித்து குடும்பத்தின் தேவையை பூர்த்தி செய்து கொள்கிறார்கள் . ஆண்களைவிட பெண்கள் 20 சதவீதம் அதிகமாகவே தன் உழைப்பை வெளிப்படுத்தியும் குறைவான ஊதியத்தையே பெறுகின்றனர்.

       இன்றைய காலகட்டத்தில் திரைப்படங்கள் பெண்களை வெறும் காட்சிப் பொருளாக காட்டவே செய்கின்றன. அரை குறை ஆடைகள் ஒருபுறம் இருக்க, விளம்பரங்களில் வாசனைத் திரவியங்கள் பற்பசை, இன்னும்,,,,. இது போன்ற விளம்பரங்கள் பெண்களைக் கொச்சைப்படுத்துகின்றன.

    ஆண் பெண் இணைந்தால் தான் சமுதாயம். இந்தச் சமுதாயம் பெண்ணை ஒரு தனி நபராக மதித்துப் பெருமை தரவேண்டும். பத்திரிக்கையில் பெண்களை நகைச்சுவை என்ற பெயரில் தரக்குறைவாகச் சித்தரிக்கப்படுவது தொடர்ந்துக் கொண்டுதான் இருக்கின்றன. பெண்ணுக்கு ஆண் என்பது எதிர்பதமே தவிர, எதிரி அல்ல. இதனை அனைவரும் உணர்ந்துகொண்டால் பெண்கள் தங்களுக்காகப் போராட வேண்டிய அவசியம் இல்லை. விஞ்ஞானத்தின் வளர்ச்சி பலவாறாக இருந்தாலும், பெண் தன் குடும்ப தேவைகளை முன்னிலைப்படுத்தியே வாழ்கிறாள். அவள் தான் இந்தியத் தாய், பெண்ணியத்தின் உள்மூச்சு இங்கு தான் இன்னமும் சுவாசிக்கப்பட்டுக் கொண்டிருக்கிறது.

   ஆண் மனதின் மிருகத்தின் வெளிப்பாடு தினமும் நடக்கும் பாலியல் வன்கொடுமைகள் ஏராளம், எடுத்துக்காட்டுக்கு சொல்லனும் என்றாலே பல நூறு இருக்கிறது. பெண்மையைப் போற்றுவோம் என்று பேசும் பெரியவர்கள் கூட, பெண் பிள்ளைகளிடம் நடந்துக்கொள்ளும் முறையைக் கண்டு மனம் பதைக்கிறோமே

      இத்தனைப் போராட்டங்களுக்கு இடையிலும் நாடாளுமன்ற சட்டப் பேரவையில் 09.03.2010 அன்று பெண்களுக்கான இடஒதுக்கீடு 33 சதவீதம் என்ற மசோதா பலத்த எதிர்ப்புகளின் இடையில் நிறைவேற்றப்பட்டது.

சமையல் செய்யும் பெண்ணால் சரித்திரம் படைக்க முடியும். இமயம் தன்னை இடுப்பில் ஏந்தி இலக்கணம் உடைக்க முடியும், என்று இந்த காலப் பெண்கள் சாதித்துள்ளனர். பெண்கள் வெறும் பிரசவங்களை மட்டுமல்ல, பூமியைப் புரட்டிப்போடும் நெம்புகோல் அவர்கள். நேசிக்க தெரிந்தால் அவளும் ஒரு கவிதைத்தான். நாம் அனைவரும் பெண் மனத்தை யாசித்து, அது பற்றி யோசித்து, சமுதாய நன்மைகளை நேசித்து வாழ முற்பட்டால், பெண்ணியம் என்பது உரிமைப் போராட்டமல்ல, உண்மை வாழ்வியல் என்பது புரியும். 

      இன்று அறிவியில் தொழில் நுட்ப வளர்ச்சி, ஊடகப்பெருக்கம் என்றும், மனித விடுதலை, சமத்துவம் என்றும் பல கருத்தாடல்கள் வந்த போதும் கூட்டுக்குடும்ப சூழலில் இருந்து, அதிலும் மரபுகளில் இருந்து தன்னை விடிவித்துக்கொள்ளாத கிராமியச் சூழலில் இவைகள் பெருமளவு சாத்தியமற்றதாகவே இருக்கின்றன. 

    வாசக நெஞ்சங்களே, எத்துனையோ வளர்ச்சி இருக்க,,,, இது குறையா என்று குமிழ் சிரிப்பு வேண்டாம், எல்லாம் சில சலுகைகள் பெறுவது போலத்தான், அவளின் சாதனையும். முழுமை எப்போது?. பெண்மை என்பது மகத்துவம் மிக்கது, யாரும் சலுகைக் காட்ட வேண்டாம். பெண்மையே நீ கடக்க வேண்டிய தூரம் அதிகம்தான், எவ்வளவோ கடந்தாச்சு,,,,,, இன்னும் கடப்போம்முல்ல,,, 

      இப்படைப்பு ‘வலைப்பதிவர் திருவிழா – 2015’ மற்றும் தமிழ் இணையக் கல்விக்கழகம் நடத்தும் ‘மின்தமிழ் இலக்கியப்போட்டிகள் – 2015’க்காகவே எழுதப்பட்டது.

 

      வகை- (3) பெண்கள் முன்னேற்றம்-கட்டுரைப் போட்டி-

      பெண்களை சமூகம் நடத்தும் விதம், பெண் முன்னேற்றம் குறித்த 
 

   என்னுடைய சொந்தப்படைப்பு என்றும் இதற்கு முன் வேறெங்கும் வெளியானதல்ல என்றும் முடிவு வெளியாகும்வரை வெறெங்கும் வெளிவராது என்றும் உறுதியளிக்கிறேன் ---- முனைவர்.சீ.மகேசுவரி.