யாந்துஞ் சலமே,,,,,

                          
 இலக்கியங்கள் மக்களின் வாழ்வியலோடு இயைந்த ஒன்று, சங்க இலக்கிய குறுந்தொகைப் பாடல் ஒன்று இப்படிச் சொல்கிறது,,

கொன்னூர் துஞ்சினும் யாந்துஞ் சலமே
எம்மி லயல தேழி லும்பர்
மயிலடி யிலைய மாக்குர னொச்சி
அணிமிகு மென்கொம் பூழ்த்த
மணிமருள் பூவின் பாடுநனி கேட்டே.
         
                                         குறுந்தொகை
                                         பாடல் எண் 138
                                         கொல்லன் அழிசி
                                         மருதத்திணை


         கொன்னூர் துஞ்சனும் யாந்துஞ் சலமே
         எம் இல் அயலது ஏழில் உம்பர்
         மயிலடி இலைய மா குரல் நொச்சி
         அணி மிகு மென் கொம்பு ஊழ்த்த
         மணி மருள் பூவின் பாடு நனி கேட்டே.

 (இப்படியும் பிரித்து பார்க்கலாம் என,,)

  முதல்நாள் உரிய இடத்தே தலைவன் வருவான் என எதிர்பார்த்து அவன் அன்று வரவில்லை. அடுத்த நாள் அவன் வரும்  போது, நேற்று வருவீர் என்று எதிர்பார்த்து தலைவி தூங்கவில்லை என்பதைத் தலைவன் கேட்குமாறு, தலைவி சொல்வதைப்போல் தோழி சொன்னது,,,

    ஊர் முழுக்க தூங்கியது. நான் மட்டும் தூங்கவில்லை. என் வீட்டிற்கு அருகில் உள்ள உயர்ந்த ஏழில் குன்றத்தின் அருகில் உள்ள, மயிலின் கால்களைப் போன்ற இலைகளையுடைய நொச்சி மரத்தின் பெரிய கொத்துக்களாக உள்ள, நீலமணியின் நிறத்தை ஒத்த மலர்கள், மென்மையாகக் கிளைகளில் இருந்து உதிர்வதைக் கேட்டபடியே படுத்திருந்தேன்.

   
சொல் விளக்கம் -

கொன்னூர் - (பரிய ஊர் ) ஊர் முழுக்க

துஞ்சினும் - தூங்கினாலும்

யாந்துஞ்சலமே - நான் தூங்கவில்லை

எம் இல் அயலது - என் வீட்டிற்கு அருகில்

ஏழில் உம்பர் - உயர்ந்த ஏழில் மலையில் மேலுள்ள

( ஏழில் என்பது ஒரு மலை. இது மன்னன் நன்னன் என்பவனுக்குரியது)

மயிலடி இலைய - மயிலின் அடியைப் (கால்களைப்) போன்ற இலைகளை உடைய

மா குரல் - கருமையான அல்லது பெரிய குலைகள்

நொச்சி - நொச்சி

அணிமிகு - மிகவும் அழகான 

மென் கொம்பு - மெல்லிய கிளைகள்

ஊழ்த்த - உதிர்த்த 

மணி மருள் - நீலமணியைப் போன்ற

பூவின் பாடு - பூக்கள் விழுவதைக்

நனி கேட்டே -  மிகக் கேட்டவாறு 

                                                              

படங்கள் இணையத்திலிருந்து,,