அரங்கேற்றுகாதை – தமிழ்ப்பல்கலைக்கழகம் 2

                 அந்நியமான அரங்கேற்றுகாதை

அரங்கேற்றுகாதை – தமிழ்ப்பல்கலைக்கழகம் 2

அந்நியமான அரங்கேற்றுகாதை தொடர்ச்சி,,,,,,,,,,,,,

    அரங்கேற்றுகாதையைப் பாடத்திட்டத்திலிருந்து நீக்கியது படிக்கிற காலத்தில் சுமைக்குறைந்த சுகமாக இருக்கும். ஆனால் பின்னர் அரங்கேற்றுகாதையைப் படித்துப் புரிந்துக்கொள்ள முயலும் போது தான் அதன் பாதிப்பு உறைக்கும்.உண்மையில் அரங்கேற்றுகாதையை மட்டும் தான் பாடமாக வைத்திருக்க வேண்டும். அது நீங்கலாக ஏனைய காதைகளை ஆசிரியர் துணையின்றியே யாரும் கற்றுக் கொள்ள முடியும். உரைநூல்கள் இருந்தும் அரங்கேற்றுகாதையைப் புரிந்துக்கொள்ள வேண்டுமானால் இசை, நாடக வல்லுநர் துணையும் கருத்தரங் விவாதங்களும் அவசியம் வேண்டும்.

      பழந்தமிழ் நாடக வழக்காறுகளை அறிய முனைவார்க்கு அரங்கேற்றுகாதை ஓர் அரிய தரவாக தகவல் சுரங்கமாக இருப்பதைத் தமிழறிஞர்கள் ஒத்துக்கொள்வார்கள். பின் ஏன் அதைக் கற்றுக்கொடுக்கப் பல்கலைக்கழகங்கள் முன்வரவில்லை? எவ்வளவு பெரிய இருட்டடிப்பு? முத்தமிழ் என்று பெருமைப்படும் நாம், இசையையும், நாடகத்தையும் மாற்றாந்தாய் மக்களைப் போலவே நடத்திவருகிறோம் என்ற உண்மையை ஒப்புக்கொண்டே ஆகவேண்டும்
.

         இப்படி வேதனைப் பட்டு ஆகக்கூடியது எதுமில்லை, செயல்பாடு ஒன்றேச் சிறந்த வழி என உணர்ந்த அறிஞர் பெருமக்கள் 1998 ல் தமிழ்ப் பல்கலைக்கழகத்தில் அரங்கேற்றுகாதை புரிதலுக்கான ஒரு மறு வாசிப்பு என்னும் தலைப்பில் கருத்தரங்கை நடத்தினார்கள். மனந்திறந்த கலந்துரையாடலாக அமைந்த அந்தக் கருத்தரங்கில், அதன் அமைப்பாளரான பேராசிரியர் முனைவர் மு.இராமசாமி அவர்களுடன் பாவலரேறு.ச.பாலசுந்தரம் அவர்கள், பத்மா சுப்பிரமணியம் அவர்கள் இன்னும் தமிழின் மிகப்பெரிய ஆளுமைகள் பலர் கலந்துக்கொண்டனர்.

   இம்மாபெரும் விதையை என்னுள் தூவிய அந்நாள் நாடகத்துறைத் தலைவர் மு.இராமசுவாமி அவர்களின் பெரும் முனைப்பால் அது நடந்தது. அக்கருத்தரங்கில் 175 அடிகள் கொண்ட அரங்கேற்றுகாதையின் முதல் 25 அடிகளுக்கு மட்டுமே விவாதங்கள் நிகழ்ந்ததோடு இரண்டு நாள் பொழுது நிறைவுற்றதால், முழுமைப் பெறாத சிறுமுயற்சியாகவே அது முடிந்தது.

அந்த அரிய கலந்துரையாடலை ஒளிப்பதிவு செய்து, அவர்கள் வெளியிட்ட கருத்துக்களை அப்படியே தட்டச்சுப்படியாக நாடகக் கலைவிழா – 2000 என்ற நிகழ்ச்சியில் 173 பக்க அளவில் வெளியிட்டார்கள்.பாராட்டப் பட வேண்டிய மிகப்பெரிய முயற்சி அது. 

    அரங்கேற்றுகாதையின் தொடக்கம் முதல் ஒவ்வோர் அடியாக அவர்கள் விவாதித்ததை, ஒரு நாடக உரையாடலைப் போலத் தொகுத்துத் தந்திருக்கிறார்கள். அந்த 25 அடிகளுக்கும் அவரவர் கருத்துக்களை நிரல்படத் தந்திருக்கிறார்கள்.அரங்கேற்றகாதைப்பற்றி அறிய முயல்வாருக்கு அத்தொகுப்புரை அந்த 25 அடிகளுக்காவது ஒரு வெளிச்சத்தைத் தரும் என்று நம்பலாம். அது ஒரு நல்ல தொடக்கம். அதில் நாம் தள்ளுவன தள்ளிக் கொள்வன கொள்ளலாம்.

    மதுரைப் பல்கலைக்கழகத்திலும், புதுவைப் பல்கலைக்கழகத்திலும் சில ஆய்வேடுகள் (M.phil)  காணப்பட்டன, அவையும் நேரடியாக அரங்கேற்றுகாதையில் செய்யப்பட்டவை அல்ல. தவறோ, சரியோ, இது தான் அரங்கேற்றுகாதையின் விளக்கம் என்று யாரேனும் ஒருவர் முழுவதுமாய் முன்மொழிய வேண்டும். பிறகு அதிலுள்ள தவறுகளை விவாதித்துப் பின் வருவார் சரிசெய்துக் கொள்ளலாம். அத்தகைய சிறு முயற்சியாகவே இதனை இங்கு குறித்துப் பதிந்துப் போகிறேன். ( என் ஆய்வில் கண்ட முடிவுகள், முடிவானது அல்ல,,,,,,) விவாதிப்போம்,,,,,,,,,

   சிலம்பின் அரங்கேற்றுகாதையை முன்னிறுத்தி            தமிழ்நாடகத்தை மீட்டுருவாக்கம் செய்தல்.

                                                 தொடர்வோம்,,,,,,